Litva Tatarlarınen “Yaşlar Lageri” Açıldı
Qırım Derneginiñ Litva Tatar Medeniyet Merkezi (Totorių kultūros centras) ile birlikte teşkil etilgen Yaşlar Lageri 2025 senesi Çiçek ayınıñ 22-sinde Salı sabahı saat 11.00’de açıluv tedbirinen başlandı.
Ankara Mogan Meslekiy Tehnik ve Anadolu Liseyiniñ tatbiq otelinde pek samimiy mühitte keçirilgen açıluv merasiminde Qırım Dernegi Baş reisi Mükremin Şahin, Litvanıñ Ankaradaki Baş elçisi Ričardas Degutis, TİKA reis yardımcısı Mahmut Çevik, Qırım Vaqfı reisi Tuncer Qalqay ve dernegimizniñ baş reis vekili Namık Kemal Bayar da iştirak ettiler.
Merasim Qırım Dernegi Baş reisiniñ çıqışınen başlandı. Şahin öz çıqışında, bütün dünyağa darqalmağa mecbur qalğan Tatar yaşlarını bir yerde toplağan böyle lagerler yapmağa yıllardır arzu etkenini ve bunıñ nihayet ömürge keçkenini körip, memnün olğanını ifade etti.
Soñra söz alğan Litva Tatar Medeniyet Merkeziniñ (Totorių kultūros centras) reisi Almira Parmaqsızoğlu öz çıqışında aynı duyğularnı bildirdi. Olar da yıllar devamında Litvada yaz lagerler teşkil etkenlerini, amma bu lagerlerniñ ösmesini ve dünyanıñ her yerinden yaşlarnıñ bir yerge toplanıp, öz medeniyetlerini saqlap qalmalarını istegenini belgiledi.
Soñra Litvanıñ Ankaradaki Baş elçisi Ričardas Degutis söz alıp, yaşlarnıñ medeniyet ve malümat almaşuvı yapılğan böyle lagerlerniñ faydası aqqında ayttı.
Soñunda çıqış yapqan TİKAnıñ reis yardımcısı Mahmut Çevik, 61 memlekette 63 Programma Koordinatsiya ofisi ile 150 memlekette çalışqan TİKA dünyanıñ dört tarafında Türk barlığını qorçalamaq içün keçirilgen er bir faaliyetni desteklegenlerini bildirdi.
Açılış sözlerinden soñ em Litva Tatar Medeniyet merkeziniñ yaşları, em de Qırım Derneginiñ «Cıyın» ansambli “Tım Tım”, “Zeybek” ve “Bağçasaray” qaytarması arqasından eki halq yırı icra etip, kiçik konsert berdiler.
Merasimniñ soñunda lagerge kelgen bütün talebelerge yaqa kartları, lager içün mahsus yapılğan yavluqlar, Taraq Tamğası olğan kündelik bağışlandı. Gruppa fotosessiyasından soñ Yaşlar Lageri evelden belgilengen programmağa köre öz işini başladı.
