Qırımtatar Medeniyet Eviniñ Musafirleri - Litva Tatar Gençleri
Dernegimizniñ Litva Tatar Medeniyet Merkezi (Totorių kultūros centras) ile Anqarada teşkil etilgen Yaşlar Lagerine kelgen yaşlar 2025 senesi Çiçek ayınıñ 24-ünde Qırım Vaqfı rehberliginde çalışqan Ballıqpınar Qırımtatar Medeniyet Evini ziyaret ettiler.
Türk İşbirligi ve Koordinasiya Agentliginiñ (TİKA) desteginen teşkil etilgen, Türkiyedeki Qırımtatar yaşlarnıñ ile Litva Tatar yaşlarnıñ tarihiy ve medeniy degerlikler paylaşuvına yönelgen Yaşlar Lageriniñ açıluv merasimi 2025 senesi Çiçek ayınıñ 22-sinde keçirilgen edi.
Qırımtatar Medeniyet Evinde Litva Tatar gençlerini Qırım Vaqfı reisi Tuncer Qalqay, Qırım Dernegi Ballıqpınar şubesi tesisçi reisi Rıfat Baybörü, Ballıqpınar şube reisi Volqan Altan ile Ballıqpınar muhtarı Yılmaz Aqbay qarşıladılar.
Ziyarette Qırımtatarlarnıñ Ballıqpınardaki ömür ve medeniy degerliklerine ait unsurlar Tuncer Qalqay ve «Cıyın» ansambliniñ bediiy rehberi Evelina Kemileva tarafından añlatıldı.
Qırım hanlığınıñ qurucısı Haci Geray hannıñ doğğan yeri olğan Litvanıñ Trakai şeerini temsil etken magnit Qırımtatar Medeniyet Evine gruppanıñ vekili tarafından künniñ hatırası olaraq bağışlandı.
Qırımtatar Medeniyet Eviniñ ziyaretinden soñra Qırım Dernegi Ballıqpınar Şubesinde Yaşlar Lageriniñ azalarına Qırım Dernegi Baş reis vekili Namıq Kemal Bayarnıñ iştirakinen atlı oq atuv boyunca dünya çempionı Alperen Alqan tarafından prezentasiya yapıldı.
