Romaniyada 30-ıncı Halqara Festival
Romaniya Türk-Müslüman Tatar Demokratik Birligi (UDTTMR) tarafından teşkil etilgen “30-ıncı Halqara Türk-Tatar Halq Oyunları, Yırları ve Ananeviy Qıyafetleri Festivali” Mecidiye ve Mangaliyada yapılğan festival yürüşleri ve halq oyunları kösteriüvleri ile başlandı.
Bu sene festivalde 5 memleketten 10 halq oyunları ve muzıka ansambli iştirak etecek. Qırım Dernegi Umumiy Merkeziniñ “Cıyın” ansambli de bu yıl umumiy reis Mükremin Şahin, Türkiye-Ukrayina Dostluq derneginiñ umumiy kâtibi Mine İmraq ve “Tuvgan til” internet saifesiniñ koordinatorı Oya Deniz Çonğar ile beraber festivalde iştirak etmek içün Romaniyağa ketti.
Festival İlk küz ayınıñ 3-ünde teşkil etilgen yürüşler ve halq oyunları ile başlandı.
Litvadan “Efsane” taqımı, Romaniyadan kelgen Lipovan Rusları “Krasıvai Venok” toplulığı, Bulgaristandan “Suygı” vokal taqımı ve Türkiyeden “YAFEM” halq oyunları toplulığı festival yürüşine qatıldılar ve Mecidiye şeherinde “Mecidiye sendikalar medeniyet evi” ögünde ötkerilgen festival sahna kösterişinde iştirak ettiler.
Qırım Dernegi Umumiy Merkeziniñ “Cıyın” ansambli, Bulgaristandan “Rodop Esintileri” halq oyunları toplulığı, Romanya Sırpları Birligi “Canadske Zvezdice” halq oyunları toplulığı, Romanya Makedonları Derneginiñ “SONTE” Toplulığı, Yunanistandan “Gümülcine” Türk Gençler birligi folklor taqımı ve Romaniya Slovakları Demokratik Birliginiñ “CEROVINA” taqımı da Mangaliya şeherinde “Mangaliya Medeniyet Evi” ögünde teşkil etilgen festival kösterişinde iştirak ettiler. Kösterişten evel Mangaliya Belediye Başqanı Cristian Radu iştirak etken bütün taqımlarğa taqdir yarlığı taqdim etti.
Her eki bölgedeki festival yürüşine taqımlar milliy qıyafetler ve ülke bayraqlarınen iştirak ettiler.
Bölge halqlarınıñ büyük meraq doğurğan ananeviy qıyafetler ile keçmeleri, tam manada, tantanalı bir numayiş edi.
Toplulıqlarnıñ, kösterişlerden soñra bölgelerdeki tarihiy ve turistik yerlerni körmek imkânı da oldu.
“Cıyın” ansambli de 1575 senesi Osmanlı Devleti tarafından inşa etilgen Esmehan Sultan Camisini kezdiler. Bu cami Romaniyada bulunğan eñ eski camidir ve yapılğan devirde qullanılğan taşları halâ sağlam, halâ tim-tik tura.
Festival, İlk küz ayınıñ 4-ünde aqşam üzeri saat 17.00-de Köstencede bütün gtaqımlarnıñ iştiragi ile yapılacaq büyük festival yürüşi ile devam etip, İlk küz ayınıñ 5-inde saat 18.00-de teşkil etilecek gala-programmı ile soñuna kelecek.
