Romaniyada Türk-Tatar Kültür Festivalinde Ekinci Kün

Romaniya Türk-Müslüman Tatar Demokratik Birligi (UDTTMR) tarafından bu sene 30 yıllığında teşkil etilgen “Halqara Türk-Tatar halq oyunları, yırları ve ananeviy qıyafetler festivali”nde 5 memleketten 17 taqım iştirak ete.

Festival Mangaliya ve Mecidiyede teşkil etilgen kortej yürüşler ve sahna kösterişleri ile bayramı İlk küz ayınıñ 3-ünde başlandı.

Festivalniñ ekinci künü olğan İlk küz ayınıñ 4-ünde ise Köstencede büyük festival yürüşi teşkil etildi. Aqşam saat 17:00-de bütün taqımlar milliy bayraqlar, Taraq Tamğalı kök bayraqlar, taqımlarnıñ bayraqlarınen milliy qıyafetlerde 2 kilometrlik yürüşte iştirak ettiler.

Bu seneniñ festivalinde Qırım Dernegi Umumiy Merkeziniñ “Cıyın” ansamblinden ğayrı Yalovadan “Yafem” ansambli, Litvadan “Efsane” ansambli, Romaniyadaki Lipovan milliy azınlığınıñ “Krasivay Venok” ansambli, Bulğaristandan “Suyğı” ansambli, kene Bulgaristandan “Rodop Esintileri” ansambli, Romaniya Makedon azınlığınıñ “Canadske Zvezdıce” taqımı, Yunanstandan “Gümülcine” Türk Gençlik Birligi, Romaniyadaki Yunan azınlığınıñ “Kallıthea” ansambli, Rumen Halq Muzıkası ansambli, Romaniya Slovak azınlığınıñ “Cerovına” ansambli, Romaniya Makedon azınlığınıñ “Sonte” ansambli iştirak ettiler. Bundan da ğayrı, Romaniya Türk-Müslüman Tatar Demokratik Birligi UDTTMRniñ toplulıqlarından festivalde “Kişkene Qarasu” ansambli, “Qarasu” ansambli, “Qaradeniz” ansambli, “Canlar” ansambli ve “Can Renkler” ansambli ev sahipleri olaraq festivalde iştirak eteler.

Türküler ve ananeviy ezgiler eşliginde teşkil etilgen ve soñ derece renkli kösterüvler içün sahna olğan coşqun büyük bayram yürüşi Köstence Limanında yekünlendi.

 

Fotoğraflar: qha, Oya Deniz Çonğar