BEKİR SIDQI ÇOBANZADEGE BAĞIŞLANĞAN ŞİİRİYET AQŞAMI
Qırım Derneginiñ Umumiy Merkezi tilimizni ve medeniyetimizni saqlamaq istegini bildirip, “QIRIMTATAR ŞİİRİYETİ, EDEBİYATI, VE MUZIKA AQŞAMI”nıñ yañı mevsimini başlay.
Yaz tatili sebebinden qısqa bir vaqıtqa toqtatılğan faaliyet 2026 senesi orta küz ayınıñ 16sı, cuma künü, saat 19.00de Bekir Sıdqı Çobanzadege ve 1926 senesi Bakudaki Birinci Türkologiya Qurultayı bağışlanğan aqşamnen ğayrıdan başlana.
1926 senesi keçirilgen Birinci Türkologiya Qurultayı, Türk dünyasınıñ tarihi, tili, edebiyatı ve elifbe meseleleri müzakere etilgen eñ büyük ilk halqara ilmiy toplaşuvdır. Çeşit türkiy halqlardan ve çet memleketlerden 131 vekil: 92 Türk ve 20 Rus – iştirak ettiler, bu qurultayda M. Fuad Köprülü, Hüseyinzade Alibey, İsmail Hikmet Ertaylan kibi Türkiyeden kelgen belli şahıslar iştirak etken edi. Öz devriniñ itibarlı türkşınası olğan Bekir Sıdqı Çobanzadeniñ de bu kongressniñ teşkil etilmesinde mühim bir rol oynağan ve iştirakçiler arasında yer alğandır.
Bu kongresste iştirak etken 100den ziyade iştirakçi soñra pantürkizmde qabahatlanıp, siyasiy basqılarğa oğratılğan edi. Alimler ve mütefekkirlerniñ çoqusı hapiske alınğan edi. Ömrüni türkiy halqlarnıñ til birligine ve ortaq medeniy coğrafiyasına bağışlağan Çobanzade de aynı zulümge oğratılıp, şehit etilgen edi.
1926 yılı Bakudaki Birinci türkologiya kongressiniñ ehemiyetli neticesi, türkiy halqlar tarafından Latin elifbesiniñ qabul etilmesi olğan edi, ancaq bu qarar 1939 yılında lâğu etilgen edi ve Sovetler Birliginde yaşağan türkiy halqlar içün Kirill elifbesi keñ qullanılıp başlağan edi Yañı mevsimniñ birinci şiiriyet aqşamında birleşmeniñ göñüllileri bu qurultaynıñ iştirakçilerini añıp, Bekir Sıdqı Çobanzadeniñ seçmeli şiirlerinden parçalarnı taqdim etecekler.
Koordinatorı Dr. Nariye Seydametova olğan bu programmnıñ soñki qısımında Qırımtatar nağmelerinden seçilgen eserlerni degerli sanatçı Adile Çerkezova ve “Yanğıray Qaytarma” muzıka mektebiniñ müdiri Refat Üsein icra etecekler.
Tedbirge Qırımtatar tili ve edebiyatımıznen, zengin tilimiz ve şiiriyetimiznen meraqlanğan ve öz yaşayışına başqa bir renk qoşmağa istegen her kes davet etile.