Romaniyada Mühteşem Gala Programmı
Romaniya Türk-Müslüman Tatar Demokratik Birligi (UDTTMR) tarafından 30-ıncı kere teşkil etilgen “Halqara Türk-Tatar Halq Oyunları, Türküleri ve Ananeviy Qıyafetleri Festivali” büyük gala-konsert ile yekünlendi.
2026 senesi İlk küz ayı 5 künü Köstence şeherinde “Jean Konstantin Çoq Maqsatlı Medeniyet Merkezi” tarafından teşkil etilgen konsertte 5 memleketten 17 taqım iştirak etti.
Festivalde, her yıl olğanı kibi, Qırımtatar medeniyetini yaşatmaq ve kelecek nesillerge yetkizmekniñ ehemiyeti qayd etildi.
Festivalin İlk küz ayınıñ 3-ünde Mangaliya ve Mecidiyede teşkil etilgen körtejler ve konsertlernen başladı.
Program çerçivesinde Köstence şeheriniñ merkezinde İlk küz ayınıñ 4-ünde ise milliy qıyafetlerde, ülke bayraqları ve Taraq Tamğalı Kök bayraqlarnen Köstence şeher merkezinde başlap, limanda yekünlengen tahminen 2 kilometrlik bir yürüş yapıldı.
Tolu-tolu 3 kün devam etken festival kerçekten de seyir etmege lâyıq bir gala-konsert ile bitti.
Konsert UDTTMRniñ reisi Celil Esergepniñ açılış nutqunen başlandı. Esergep nutqunda bu yıl 30-ıncı kere ötkerilgen festivalniñ özleri içün taşığan ehemiyeti haqqında söz yürsetti.
Soñ konsert programmı başlandı.
Festival devamında gala-konsertte cemaatlarnıñ kortej yürüşleri, sahna kösterüvlerinde seyircilernen körüşken grupplar, gala gecesinde ise ananeviy qıyafetler, halq oyunları ve muzıkaları ile seyircilerge tam bir numayış taqdim ettiler.
Sahnege istidatlı yırcı Adile Çerkezovanen beraber çıqqan Qırım Dernegi Umumiy Merkeziniñ “Cıyın ansambli” ise hem seyirciler tarafından yüksek degerlendirdiler, hem de gece boyunca adı hep tekrarlanğan taqımlardan biri oldular.
Ansambl ilk olaq Çerkezova seslendirgen “Qırım Qızı” adlı yırğa eşlik ettiler. Qızlarımıznıñ oyunlarıdaki zarafetleri körülmege lâyıq edi.
Soñra Adile Çerkezova muhteşem sahna numayışı ve “Mavı Boncuq” adlı yırınen bütün salonnı coşturdı.
Horeografiyası ve sahnalaştırması Cıyın ansambliniñ hocası Evelina Kemilevağa ait olğan, taqımımıznıñ eñ güzel kösterüvlerinden biri olğan “Çiberek Oyunı” ise coşqunlığı, şeñligi ve, elbette, oyuncılarımıznıñ usta yorumı ile büyük alğış aldı.
Kösterişniñ soñunda “Tuvğan til” internet saytınıñ koordinatorı Oya Deniz Çonğar oyuncılarımıznen beraber Romanya Milliy TV’sine bir intervyu berdi. Çonğar böyle dedi: “Bu festival pek mühimdir. Halqımız yaşağan bu zor devirde tilimizniñ ve medeniyetimizniñ yaşatılması, tanıtılması kelecek nesillerge aqtarılabilmesi içün böyle işler pek qıymetlidir. Keşke daha çoq olsa”. Çonğar çoq begenilgen “Çiberek oyunı” haqqında sualge böyle cevap berdi: “Bu oyun bizim taqımımıznıñ eñ güzel oyunlarından biridir. Horeografiyası ve sanalaştırması taqımımıznıñ qıymetli hocası Evelina Kemilevağa aittir. Ne yazıq ki, hocamız ailesinde yaşanğan bir sağlık meselesi sebebinden bu yıl bizimnen birlikte olamadı. Ancaq bu vesile ile bu güzel oyun içün kendisine tekrar teşekkür bildiremiz”.
Renkli ananeviy qıyafetler, yırlar ve halq oyunları ögge çıqqan bu gecede, taqımlarnıñ sahna çıqışları seyirciler tarafından çoq meraq kördü.
Fotoğraflar: qha, Oya Deniz Çonğar